पवार आयोगासमोर उपस्थित राहणार
कोरेगाव भीमा हिंसाचार प्रकरणाच्या चौकशीसाठी आयोगाची स्थापना करण्यात आली होती. आता या आयोगाकडून पवार यांना साक्ष नोंदवण्यासाठी समन्स पाठवण्यात आले आहे. कोरेगाव भीमा हिंसाचार प्रकरणात आता पवार यांची साक्ष नोंदवली जाणार आहे. बजावण्यात आलेल्या समन्सनुसार पवार येत्या 23 फेब्रुवारीला आपली साक्ष नोंदवणार आहेत. त्यांना 23 फेब्रुवारी रोजी उपस्थित राहण्यास सांगण्यात आले आहे.
पोलिस अधिका-यांनाही समन्स
पवार यांच्यासोबतच तत्कालीन पुणे पोलिस अधीक्षकांना आणि अतिरिक्त पोलिस आयुक्तांनाही समन्स पाठवण्यात आले आहे. पुण्याचे तत्कालिन पोलिस अधीक्षक सुवेझ हक आणि अतिरिक्त पोलिस आयुक्त रवींद्र सेनगावकर यांना समन्स पाठवण्यात आले आहे. आता या सर्वांची साक्ष नोंदवण्यात येणार आहे.
काय आहे नेमके प्रकरण?
1 जानेवारी 2018 रोजी पुण्यातील भीमा कोरेगाव येथे हिंसाचार झाला. त्यात एकाचा मृत्यू झाला, तर दहा पोलिसांसह अनेक जण जखमी झाले होते. या घटनेचा निषेध म्हणून पुकारण्यात आलेल्या महाराष्ट्र बंददरम्यान पोलिसांनी एकूण 162 जणांवर गुन्हे दाखल केले होते. पुण्यात भरवण्यात आलेली एल्गार परिषद व त्यातील चिथावणीखोर भाषणांमुळे कोरेगाव भीमात हिंसाचार उसळल्याचा ठपका ठेवण्यात आला होता. त्या प्रकरणी अनेक जणांवर कारवाई करण्यात आली आहे. या प्रकरणाच्या चौकशीसाठी राज्य सरकारने न्यायमूर्ती जे. एन. पटेल यांच्या अध्यक्षतेखाली एक चौकशी आयोग नेमला आहे. या चौकशी आयोगाकडून साक्ष नोंदवण्यासाठी पवार यांना समन्स पाठवण्यात आला आहे.
पवार यांची साक्ष नोंदवण्याची मागणी
संभाजी भिडे यांच्या वक्तव्यामुळेच कोरेगाव भीमामध्ये हिंसाचार उसळल्याचा आरोप त्या वेळी शरद पवार यांनी केला होता. पवार यांच्या या वक्तव्यानंतर पवार यांचीदेखील साक्ष नोंदवण्यात यावी, अशी मागणी अॅड. प्रदीप गावडे यांनी केली होती. त्यानंतर आता चौकशी आयोगाने पवार यांची साक्ष नोंदवण्यासाठी त्यांना बोलावले आहे. यापूर्वी रश्मी शुक्ला आणि परमबीर सिंग यांनादेखील साक्ष नोंदवण्यासाठी समन्स बजावण्यात आले होते.
