ही घटना काल दि. 23 फेब्रुवारी रोजी सकाळच्या सुमारास उघडकीस आली. या घटनेबाबत हॉटेल चालकाने पोलिसांना (Police) खबर दिली.
दरम्यान, महिलेच्या नातेवाईकांचा शोध सुरू असून आत्महत्येचे निश्चित कारण समजले नाही. त्या महिलेने कोणत्या कारणाने आत्महत्या केली? याचा तपास राहुरी पोलीस करत आहेत. या घटने बाबत उशिरापर्यंत गुन्हा दाखल करण्याचे काम सुरू होते.
अनिता राजू कणसे (वय 31 वर्षे, रा. पुणे शहर, धनकवडी, ओंकार अपार्टमेंट, सावरकर चौक) असे नाव व पत्ता मयत महिलेच्या पर्समध्ये मिळालेल्या आधारकार्डवर आढळून आला आहे. या महिलेने दि. 22 फेब्रुवारी रोजी राहुरी येथे येऊन राहुरी खुर्द ग्रामपंचायत हद्दीत असलेल्या हॉटेल न्यु भरत या ठिकाणी दुपारी बारा वाजे दरम्यान एक खोली भाडोत्री घेतली. काल सकाळी अकरा वाजे दरम्यान साफसफाई करणार्‍या एका महिलेने तिच्या खोलीचा दरवाजा वाजविला.
परंतु आतून काहीच प्रतिसाद आला नाही. तिने तातडीने ही माहिती हॉटेलचालक यांना दिली. त्यांनी दरवाजाच्या फटीतून आत डोकावले तेव्हा ती महिला गळफास घेतलेल्या अवस्थेत दिसली
हॉटेल चालक यांनी तातडीने राहुरी पोलिसांना घटनेची माहिती दिली. राहुरी पोलीस ठाण्यातील पोलिसांनी घटनास्थळी धाव घेऊन पाहणी केली.
खोलीचा दरवाजा पोलिसांसमक्ष तोडण्यात आला. त्यावेळी ती महिला छताला असलेल्या फॅनला ओढणीच्या सहाय्याने गळफास घेतलेल्या अवस्थेत होती. तिला तातडीने राहुरी येथील ग्रामीण रुग्णालयात नेण्यात आले. परंतु वैद्यकीय अधिकार्‍यांनी तिला उपचारापूर्वीच मयत घोषित केले.
सदरची घटना घडल्याने परिसरातील हॉटेल चालकांमध्ये वेगळीच भीती निर्माण झाली आहे.
